ភ្នំពេញ៖ អគ្គនាយកគយ និងរដ្ឋាករ លោក គុណ ញឹម ថាក្នុងឆ្នាំ២០២៣នេះអគ្គនាយកដ្ឋាននឹងមិនលើកសំណើរកែប្រែអាករពិសេសបន្ថែមបន្ទុកលើកអ្នកប្រើប្រាស់នោះទេ លើសពីនោះអគ្គនាយកដ្ឋាននឹងពិនិត្យបន្ថូរបន្ថយពន្ធមួយចំនួនថែមទៀត ដើម្បីចូលរួមជួយដល់ពលរដ្ឋក្នុងពេលដែលប្រទេសទើបងើបចេញពីវិបត្តិនៃជំងឺកូវីដ-១៩។
ថ្លែងក្នុងសន្និសីទសារព័ត៌មានស្ដីពី លទ្ធផលបិទបញ្ចប់ការងារប្រមូលពន្ធអាករលើរថយន្តគ្មានពន្ធមានស្រាប់ក្នុងប្រទេស ល្ងាចថ្ងៃទី១២ ខែមករា ឆ្នាំ២០២៣ លោក គុណ ញឹម បញ្ជាក់ថា៖ «យើងសុខចិត្តខាតបង់ពន្ធគយពីការអនុវត្តការតាព្វកិច្ចរបស់យើងពីក្របខណ្ឌកិច្ចព្រមព្រៀងសេរី ប៉ុន្ដែទន្ទឹមនឹងនោះក៏យើងមិនបន្ថែមបន្ទុកក្នុងកាលៈទេសៈដែលប្រទេសយើងកំពុងស្ថិតក្នុងស្ថានភាពស្ដារនិងអភិវឌ្ឍន៍សេដ្ឋកិច្ចឡើងវិញបន្ទាប់ពីកូវីដ-១៩ នេះដែរ»។
លោកបញ្ជាក់ថា បច្ចុប្បន្នគយក៏កំពុងធ្វើការកែសម្រួលអត្រាពន្ធអាករមុខទំនិញមួយចំនួនដើម្បីកាត់បន្ថយពន្ធនាំចូលដើម្បីជួយដល់ពលរដ្ឋ។
លោក គុណ ញឹម៖ «នេះវាទាក់ទងនឹងគោលនយោបាយពន្ធ គោលដៅរបស់យើងគឺកាត់បន្ថយបន្ទុក ជាពិសេសឥឡូវនេះគឺយើងពិនិត្យលើមុខទំនិញត្រូវការចាំបាច់ប្រចាំថ្ងៃរបស់ប្រជាពលរដ្ឋ»៕
